環保署按收碳費 環團嗙收費方式.時間攏無規範

舊年環保署捌委託倫敦政經學院,計算出臺灣應該愛收偌濟碳排放的費用。毋過環保團體煞認為,環保署佇今年提出的「氣候變遷因應法」煞是無共收費的標準寫入去,時間的部分也攏無規範。

3月17,環保團體召開記者會,講環保署捌佇舊年委託倫敦政經學院LSE計算臺灣政府對產業碳排放的收費標準,但是今年環保署提出的「氣候變遷因應法」草案當中,干焦講著會建立碳費的收費機制,但是詳細的收費方式、時間等等,煞完全攏無規範。

學者表示,碳費的收入會用佇溫室氣體減量的工作,若是會使共這个收入用佇補貼大眾運輸頂懸,予民眾更加願意坐大眾運輸,嘛會當達成減少污染的目標。

環保團體表示,環保署以前有講,碳費按算每噸收一百箍新台票,學者計算,按呢每度電干焦會收著半角銀的碳費、每公升汽油嘛只有兩角外的碳費,一定誠僫有效果。

學者表示,若是LSE提出的方案就加真好,每噸對10箍美金開始,慢慢增加至2030年98箍美金的目標;佮每噸一百箍的方案相比,以一美金換28箍新台票來算,上懸會當差到27倍外。環團講,台灣的減碳表現佇全球是後段班,應該愛較拍拚,呼籲環保署愛制定有效的碳費才會使。
 

全台敬老金大調查

相關新聞