西藏抗暴62年遊行 望世界看見藏人受中國迫害

西藏自1949年開始，受著中國的武力迫害，1959年三月初十發生抗暴行動，目前猶有十五萬的西藏人佇海外流浪。下禮拜三西藏抗暴滿62周年，今仔日下晡有一陣佇臺灣的西藏人佮臺灣的公民團體，佇台北辦遊行，欲共西藏鬥相伨。

跪落來磕頭，踮佇台灣的西藏人士，用西藏特殊的磕長頭禮佛方式，感謝佇310抗暴前後不斷持續抵抗中共暴政的西藏人民。另外，in嘛參台灣公民團體，用行動劇重現1951年西藏政府佇中國武力威脅下．簽訂的17條協議的情景。

今年是西藏抗暴的62周年，踮佇台灣的西藏人，和台灣民間幾若个公民團體，已經相連紲18冬佇台北做伙舉辦大遊行。這擺除了立委、政黨代表，受著真濟西藏人尊敬，以及達賴喇嘛倚重的格爾登仁波切，嘛親身參加。

代表民進黨參與活動的副秘書長林飛帆表示，台灣是有能力協助這寡人民主受著破壞國家，予in佇台灣人權受著保障。毋過政府是毋是有法度提供實際的保障，親像難民法的修正，立委范雲是講，目前猶需要較閣濟的討論。

西藏自1949年開始受著中國的武力迫害，1951年簽訂有真大爭議的17條協定，1959年三月初十，發生抗暴行動以後，目前有十五萬的西藏人流亡海外，今仔日的遊行，網路也全程直播，向望全世界攏會當知影西藏目前的狀況。