馬雅各醫療貢獻大 過往百冬.臺南辦活動紀念

對英國來臺灣的馬雅各醫師,有"臺灣醫療宣教之父"的稱號,今年是伊過往的1百週年,為著欲紀念伊對臺灣的貢獻,這禮拜佇台南,連紲舉辦紀念活動,有音樂會,佮珍貴的影像文物紀念展,欲予民眾了解,馬雅各醫師對咱臺灣的付出佮影響。

伊就是馬雅各醫生,佇156年前來到台灣,因為有伊,台灣才開始有西醫病院、台語羅馬字教學。

這馬佇台南新樓病院外口,有一座馬雅各的銅像,遮是台灣第一間西醫病院,伊就是創辦人,其實伊佇1864年踏入台灣了後,隔轉年是來到台南仁愛街開第一間西醫館,替人看病宣教,另外伊佇台南嘛創辦第一間教會,伊佇台灣才短短八冬,毋過對醫療、文化佮教育攏影響真深。

今年拄好是馬雅各過往一百年紀念,台南各界決定欲大大慶祝,所以這禮拜佇台南相連紲舉辦活動,毋但有紀念展,展出文物佮影像,發行紀念郵票、音樂會,嘛會使tshuā民眾踏查馬雅各往過(íng-kuè)宣教的所在,就是希望台灣民眾會當學習,馬雅各醫生愛人疼人、願意付出的這款精神。

全台敬老金大調查

相關新聞