民眾擲糞埽.業者排廢水 嘉義布袋鹽管溝全臭味 | 公視新聞網 PNN

民眾擲糞埽.業者排廢水 嘉義布袋鹽管溝全臭味

嘉義布袋漁會附近的大水溝仔,過年這段時間,有人來偷倒糞埽,各種垃圾物仔攏浮佇水面,這站仔閣有豉菜脯的廢水流入來,風一吹來,附近有影全全臭味。

排水溝內底,看會著蓋濟糞埽浮佇咧頂懸,水面閣有奇怪的物件,風若是吹來,就有一陣一陣衝鼻的臭酸味。附近民眾表示,這个問題逐冬攏有,反應到今嘛猶未解決。

附近民眾認為,水溝的臭味是邊仔見龍里的菜脯業者製造出來的,閣加上水門無開,水一直窒牢(tiâu),才會愈來愈臭。毋過見龍里的里長表示,見龍里以前有咧做菜脯,這站仔驚去影響著別人,已經沓沓仔減少。

嘉義縣環保局指出,糞埽的問題已經有倩人來處理,未來閣會考慮佇遮裝監視器,而且水質淨化的工程嘛已經動工,明年完工了後,就會當改善這个長久以來的問題。

相關新聞

留言區