過年點燈.添油香積350萬 廟方著拜託警方保管

新竹市今年就有一間廟寺,過年期間收著350萬的現金,煞是煩惱過年期間銀行無營業,只好拜託派出所鬥相共。警方嘛共錢囥入去警察局內底的手銃保管室,保管到過年後。

民眾誠心拜拜,過年時陣真濟廟寺提供點燈佮安太歲的服務,嘛加添袂少油香。毋過過年期間銀行無營業,廟內底囥遮濟現金,難免有安全的顧慮(kòo-lī),廟方只好拜託警察鬥相共,共錢暫時寄佇派出所保管。

門一間閣一間共拍開,欲入去到上內底的銃械室誠無簡單,共袋大筆現金的紙橐仔囥佇遮鎖起來,算講是規間派出所內底上安全的所在。

派出所出借平常時囥銃枝的所在,保護350萬的香油錢,對初一保管到初五,等到銀行開門,警方才閣協助廟方,共遮的錢送提來銀行寄,嘛予信眾佮廟方加較放心。

相關新聞

專題|全台敬老金大調查