嘉南水情著柑仔色燈號 部份公共設施暫停送水

嘉南地區洘旱是那來那嚴重, 這個月25號開始,嘉義佮臺南的水情燈號,已經來到柑仔色,著愛減量送水。目前會暫停一寡公共設施的維護用水,嘛會針對用水用真傷的企業,來進行省水的輔導,希望逐家做伙來儉水。
 

嘉義市中心知名的噴水圓環,因為洘旱節水,這馬開始暫停使用。佇街仔路頂面,減少塗砂坱埃的掖(iā)水車,嘛開始使用回收水。25號起,嘉義縣市的水情燈號對黃色轉做柑仔色,一寡用水這陣開始攏愛暫停。

自來水公司表示,會要求工業區的工業用水愛省7%,嘛會專案來輔導每個月用水超過1千度的非工業用戶愛省水10%。針對這個情況民眾雖然真煩惱,但是嘛干焦會當配合。

嘉義市水資源回收中心表示,in一工大約有4百至6百噸的回收水會當提供予民眾使用,但是遮的水干焦通用佇一寡仔建築(tiok)、道路的清洗,抑是提來沃花草,袂使接觸(tshiok)著人體,也呼籲民眾,目前雖然民生用水猶未完全受著影響,嘛是愛盡量減省。
 

九合一選戰解析

相關新聞