醫療工會陳情 健保費起價.基層醫護負擔猶重 | 公視新聞網 PNN

醫療工會陳情 健保費起價.基層醫護負擔猶重

臺北市醫師職業工會,今日和幾若个相關產業工會開記者會,認為今年健保費若起價,對基層的醫護人員也是看有食無;另外健保會內底,真濟成員一直連任,基層的勞工根本就無法度入去參與。

今仔日台北市醫師職業工會佮濟濟的醫療相關工會佇健保署頭前開記者會,講雖然今年開始健保費已經起價矣,不過對基層的醫護人員來講,是看會著、煞食袂著。以台北市立聯合病院的護理費為例,健保署講撥錢欲改善基層工作環境,想法是真好,毋過遮的護理費並無明確規定欲按怎開,結果錢根本無法度撥用佇基層人員身上。

工會認為,錢無法度直接撥付予基層人員,是因為負責決定健保費預算的健保會內底,完全無基層的代表,而且是有真濟委員已經連任足久矣。

親身出面接受陳情的健保署長李伯璋承認,親像護理費這種錢無法度用佇基層人員身上,顛倒變成病院的收入,確實是一个盲點。

針對健保會委員長期連任的問題,李伯璋表示,今仔日工會共問題講出來,負責健保會組成的衛福部就會聽著,選委員的時陣勢面(sì-bīn)就會改變。若講著後一屆的健保會敢會使予基層有較濟的參與機會,署長講這毋是伊負責的範圍,但是一定會佇健保會傳達這个訴求。

相關新聞

留言區