熱氣球慶51周年 南投長福國小拚轉型實驗小學 | 公視新聞網 PNN

熱氣球慶51周年 南投長福國小拚轉型實驗小學

南投國姓鄉有一間國小,前一站仔為著欲慶祝學校51周年,專工安排熱氣球的體驗,也順紲用趣味的方式,教學生熱氣球的原理。

大人囡仔做伙咧跳舞,畫面看起來誠古錐,毋但這項表演,閣有社區的媽媽舞團佮學生囡仔組成的非洲鼓樂團,攏帶來精彩的表演。

這寡鬧熱滾滾的演出,攏是咧慶祝南投縣國姓鄉長福國小51週年的校慶。除了這寡歌舞表演以外,長福國小佮安排一項特別佮有教育意義的活動,熱氣球的教學體驗。

有袂少家長佮囡仔是頭一遍現場看著熱氣球升空,感覺真心適。會安排這場活動是因為長福國小今年1月申請欲做實驗小學,期待透過熱氣球這款趣味佮有教練講解原理的教育活動,予審核順利通過。

其實長福國小的學生干焦27个,但是這場校慶活動煞有百外外人來參加,會當看學校佮社區感情佮互動攏真峇。

相關新聞

留言區