囡仔搶欲回答，煞攏無人講著，林園湳仔地上出名，這一尾一尾古錐的生物叫海䖳，而且in攏是倒頭栽泅水。
斟酌共看，不管是海䖳仔囝抑是大隻海䖳，攏是反輦轉浮佇水面，親像一蕊花，而且天氣愈寒，數量愈來愈濟，這馬規片湖內底攏是，最近閣有發現藍色海䖳，真罕見。
因為海䖳看起來誠古錐，毋但有老師tshuā學生來參觀，大人看著嘛感覺誠趣味，每冬十月到隔轉年五月，佇林園湳仔地攏會當遮邇近看著顛倒海䖳，蘇文華估算舊曆過年這時陣上濟，至少有五、六萬尾，遊客來林園毋但會當欣賞顛倒海䖳，閣會使來遮搧海風，看四角形海湧。
四角形海湧，上早是佇法國佮馬祖蓋有名，是世界級美景，想袂到佇林園汕尾嘛有，而且規年通天攏看會著，已經是林園新的景點。
