延後開學致菜蔬銷無路 新竹縣助農民度難關

受到疫情影響,中央宣布高中以下的學校延後開學,雖然講干焦延後四工,煞也影響著提供菜蔬予學校做營養午餐的農民,原底欲予學校的菜蔬,這馬煞雄雄銷無路。新竹縣農業處佮農會,這馬是趕緊揣新竹地區的機關團體做伙來鬥買菜。

中晝頓的菜色逐項看起來攏足豐富,學生食甲誠歡喜。新竹縣總共有120間國中佮國小,營養午餐一禮拜有2擺是使用在地有機青菜,總量大概7公噸。毋過這馬因為開學愛慢4日,青菜有可能銷無路。

這擺受著影響的青菜,原底按算17開始採收,真濟活栽早佇頂個月就已經種落去,若是無照時間採收,恐驚會打亂紲落來的種作,農會希望逐家做伙來共農民鬥相共。

農會表示,原本的規劃加減受影響,希望逐家互相體諒,團結才通好度過疫情的衝擊。

全台敬老金大調查

相關新聞