東港華僑市場嚴格防疫猶冷清 攤販煩惱歹過年

欲過年矣,東港的華僑市場,嘛出現來款過年的民眾。雖然市場無受「八大類場所」的規範,毋過魚仔市場也要求擔頭佮民眾攏愛掛喙罨,市場內底袂使試食。業者也煩惱講,若準民眾毋敢出門,今年仔市仔,恐驚是冷冷清清。

華僑市場攏是現流仔,毋但真鮮,魚仔蝦仔佮蟳仔啥物海味攏有,毋過真濟擔仔煞等無幾个人客來買。

這个賣sa-sí-mih的擔仔攏無人,頭家講in這馬做外送較濟,東港的華僑市場有五百个攤位,是全台灣上大的漁產品直銷中心,欲過年矣,這馬採購年貨的民眾沓沓仔較濟,為著防疫,魚市場嚴格要求袂使試食,業者佮人客逐家攏愛掛喙罨。

其實佇市場內底,猶原有遊客無掛喙罨,魚市場已經廣播、佇門口貼公告提醒,雖罔防疫嘛是愛過年,看著人客遮爾仔少,有攤販拍算過年規氣來歇睏。

這馬一直到過年,華僑市場無歇睏,毋過對攤商來講,今年恐驚會真歹過年。
 

全台敬老金大調查

相關新聞