用科技方法飼豬 臺灣豬農拍品牌拚外銷國際

美國瘦肉精豬肉開放進口了後,台灣豬肉加減攏會受著影響。毋過佇台灣,已經有豬農早就建立家己的品牌,利用科技飼豬,對生產到買賣攏家己做,甚至會當外銷,面對自由貿易的趨勢,遮的豬農認為台灣的豬肉,一定愛揣出特色、做品牌,才會當佇國際佮人競爭。

豬肉片囥入去鼎仔內底,連鞭煎出芳味,燒肉配白米飯就真好食,閣有肉燥飯,有肥有瘦,連豬皮嘛滷透,真唌人。入喙甘甜的豬肉,攏是台灣烏豬肉,而且是純種平埔烏豬。

李榮春12冬前,對科技業轉飼豬,一開始伊就決定飼台灣烏豬,建立家己的烏豬品牌,這馬伊有豬母場、肉豬場,三千隻豬仔,2018年閣共台灣烏豬銷去香港,而且嘛有餐廳店面賣烏豬肉。

來到彰化張勝哲的豬場,伊的豬仔蹛佇封閉的負壓豬牢。伊仝款有科技業的背景,轉來老爸的豬場接手,認為飼豬愛徛佇消費者這爿來思考。

這馬張勝哲有飼特殊的綿羊豬等等,攏總五千隻,大部份提供高級餐廳,伊認為這馬民眾願意加開寡錢食健康。面對萊豬開放,看著日本的案例,豬農猶是煩惱。

in嘛認為,會曉飼豬,無一定會曉做品牌,猶是愛拍團體戰。

台灣飼豬成本懸,只有用品種佮品質,甚至組國家隊,才會當拍出咱台灣豬家己的品牌。
 

全台敬老金大調查

相關新聞