全球疫情猶原嚴重，教育部原底針對無法度入境的境外學生，有推出安心就學方案，建議學校提供遠距離教學，予遮的境外生會使佇家己的母國學習。毋過境外生權益小組指出，安心就學方案是無強制性，嘛是有學校無提供完善的服務。
教育部今仔日回應，講教育部佇109年2月就要求學校要提供遠距離教學，學校若是無法度提供境外生適當的協助，就會減少學校境外生的招生數量；嘛會開始實地訪查學校，而且會提供需要的經費協助學校。
記者嘛有接著投訴，講桃園的中原大學就無法度提供境外生遠距離教學，毋過中原大學表示，無了解這位學生的情形，希望這位學生會使直接佮學校討論。
