清大改良機械手骨 通模仿人類動作.為防疫盡力

科技愈來愈進步,機械手骨已經漸漸用佇生產製造,猶毋過親像醫療、照護這方面,因為動作愛閣較精準,要求是愈來愈懸。清大的研究團隊,最近研發出一款機器人,會使模仿人的手骨動作,希望未來嘛會使運用佇醫療照護。

機械手骨共衛生紙抽出來,看起來真輕可的動作,對機器人來講,其實是誠無簡單。閣有這个準確共罐仔提起來的動作,攏是靠先共人的動作數位化,才通閣教機器人按怎做。

機器人閣有追蹤物件的功能,佇頭前囥3个黑色的杯仔,共球囥入去其中一个,紲落來共杯仔換位,機器人的頭嘛綴咧轉動,相準目標,最後順利揣出囥球的杯仔。

研發團隊表示,疫情期間嘛會使利用機械手骨,代替這馬的人工採檢,毋但會使減輕醫療人員的負擔,嘛閣加一份安全的保障。

相關新聞

專題|全台敬老金大調查