南市2日軍彈藥庫擬列冊追蹤 煞予人亂擲糞埽

臺南仁德三爺溪邊仔,有兩間75年歷史、日本時代軍事炸彈的倉庫,舊年臺南市文資處會勘評估,按算欲列冊追蹤;想袂到最近煞予人抨糞埽,而且倉庫附近咧施工,地基攏崩去,當地文史人士誠煩惱。

佇三爺溪邊仔,這座日軍囥炸彈的三角形庫房,這馬親像一个糞埽堆。

宋德威因為對二戰遺跡有興趣來遮參觀,想袂到發現現場予人烏白擲糞埽,這个日本時代的軍事炸彈庫房,其實有75年歷史,規个建築物誠完整,嘛誠罕見。

毋過這馬遮毋但親像糞埽堆,外口倚近三爺溪的所在,地基已經崩去,另外一間日軍倉庫,親像廢塗,閣用塑膠帆布崁起來,舊年當地民眾發現,邊仔整治工程破壞建築,要求愛保留這兩个日軍庫房,台南市文資處會勘了後決定,欲列冊追蹤。

文史人士向望台南市府跤步較緊咧,文資處表示,in會要求施工單位,處理崩塗的問題,目前這个案的資料閣愛調查較完整,才會當送審議會。

全台敬老金大調查

相關新聞