臺灣的料理大部份攏會摻蒜頭落去芡芳，按呢食起來才有夠氣。秋冬天是上適合種蒜頭的季節，蒜頭嘛是彰化、雲林、嘉義佮臺南地區重要的經濟作物之一。
進前因為貨運受著疫情影響，猶閣有海關查驗無通過的關係，進口的蒜頭攏無法度入來臺灣，造成國產的蒜頭大起價，連栽仔嘛變甲貴參參，予真濟農民咧躊躇到底敢欲換種別項，毋過嘛有少年農民堅持用無毒的方式，繼續來種蒜頭。
蒜頭毋但是會當加添料理的氣味，對人體嘛有真濟功效，親像增加抵抗力、預防心血管疾病，猶閣對控制血糖有幫助。郭孟和希望伊種出來的無農藥殘留的蒜頭，會當予逐家食著閣較健康、閣較安心。
