社會住宅公聽會 民團:以民眾通負擔租金做標準

前一站仔,臺北市明倫住宅3房型的租金,超過4萬,引發爭議。今仔日有民間團體參加公聽會,也呼籲中央,趕緊佮地方政府參詳社會住宅的收費標準。毋但民眾愛會當負擔,地方政府也愛有利頭,才通完成蔡政府所講的8年20萬戶社會住宅。
 
四序寬曠的房型,閣有公共設施會當使用,全台灣這陣已經有欲2萬人蹛社會住宅,不過社會住宅的租金中央和地方按怎負擔,社會住宅推動聯盟召集人彭陽凱表示,若以中央這馬的算法,社會住宅逐坪平均租金超過510箍,中央就袂補助,現在六都的社會住宅,起和營運的成本攏超過,這補助地方根本看有請無。

像頂日仔台北市明倫住宅3房型,摻公共設施了後的總坪數,租金超過四萬,引發爭議,台北市政府這馬就表示,這成本會家己吸收。

蔡政府捌喝出有信心佇2024進前,佇全台灣新起12萬戶社會住宅,另外閣有8萬戶包租代管,不過社會住宅的房型大細、結構強度、建物標章和申請人的補助金標準等等,若無訂予清楚,地方嘛無一寡利頭,恐驚會真僫達成。

內政部表示針對住宅政策會隨時做調整,民間團體也建議政府參考香港,將社會住宅一樓做商場,收一寡租金,加減塌寡營運成本,或者是像韓國中央政府成立國家住宅基金,予起社會住宅的單位通好請補助或者是借用,社會住宅政策的好意才會當真正實現。
 

九合一選戰解析

相關新聞