推食農教育受肯定 臺南官田國小著貢獻獎

臺南市官田國小，推動食農教育、已經超過十冬，學校內地、種真多無仝款的菜蔬，予幼兒園佮小學生，自細漢就可以體驗作穡人的辛苦，對土地感恩。最近，學校拿著農委會頒發的「食農教育貢獻獎」。

學生囡仔蹽落菱角田，歡喜咧採收辛苦種出來的菱角，遮是臺南市官田區的官田國小，佮農會的四健會合作，投入大量的資源，佇校內建設濟濟場地，來推動食農教育，已經超過十冬，受著農委會的肯定，得著109學年度的「推廣食農教育傑出貢獻獎」。

除了菱角以外，官田國小也利用校內濟濟食農教育場地，規劃真濟種作物的實作，親像稻仔、柑仔蜜、高麗菜佮草莓等等，予囡仔會當學著各種無仝款的種作方式，落實幼兒園佮小學囡仔的食農教育。

為著欲促進人民去了解食物的來源佮在地的農業，猶閣有思考環境、生態的永續發展，農委會是大力咧推動學校的食農教育，官田國小嘛積極咧響應、規劃課程，向望會當予學生囡仔閣較了解作穡的辛苦，寶惜食物佮咱的土地。