冬天落山風.溫泉加持 屏東車城西瓜氣味好 | 公視新聞網 PNN

冬天落山風.溫泉加持 屏東車城西瓜氣味好

臺灣真正是寶島,一年四季有水果。熱天時仔咱攏會食西瓜,這馬寒天也有西瓜通好食哦。屏東的車城,寒天也有出產西瓜,受著落山風的庇蔭,車城的西瓜甜閣鬆脆,咱趕緊來去看覓。

講著西瓜,是咱佇熱天時仔上捷食著的水果,有人提來攪汁,有人提來做冰。食落到塊透心涼。毋過寒天時仔的車城,也有出西瓜,滋味一點也袂輸熱天時仔的水準。

真濟人攏認為,西瓜是熱天才有的水果。其實屏東車城,好一步地理優勢,毋但寒天雨水少、閣有落山風,加上附近的溫泉水,這個所在出產的西瓜,氣味確實無仝款。

因為地理環境的關係,毋但芳氣十足、又閣濟湯。鄉公所也有特別舉辦:【車城鄉西瓜節】,也邀請民眾做伙落去西瓜田裡挽西瓜。鄉公所表示:寒天時仔的屏東,毋但有溫泉、落山風,猶閣有西瓜,希望民眾來到屏東,會當來行踏,體驗無仝的口味。
 

相關新聞

留言區