高屏國產紅豆當大出 價數煞崩盤.無夠成本

每年12月中是臺灣紅豆仔收成的日子。高雄、屏東這寡主要產地,今年頭一批買賣的價數,一斤上俗愛32箍。這款價數也比農民成本閣較低。農民認為是佮天氣較熱,品質䆀,而且庫存濟、市場消費也減少,攏有關係。

大寮種紅豆仔的農民,這馬攏咧無閒採收,毋閣若講著紅豆仔的價數,真濟農民攏笑袂出來。

大寮農會紅豆產銷班的成員,因為攏是用自然農法,閣有農會契作,用一斤47、48箍的價數收購,若無,紅豆仔開盤價數攏無好,舊年一斤閣有38箍,今年佇屏東萬丹,出現一斤32箍, 根本無夠成本。

毋但天氣熱影響紅豆的品質佮產量,來到大寮農會的倉庫,舊年紅豆仔的庫存至少閣有128噸,今年拄才收的貨嘛有一大堆,國產紅豆消費愈來愈少,攏是今年紅豆落價的原因。

農糧署表示當咧研議補貼,嘛鼓勵盤商用較好的價數,幫助農民度難關。
 

相關新聞

專題|全台敬老金大調查