保留大量二戰遺址 屏東春日鄉發展軍事觀光

屏東的春日鄉保留大量日本時代起的軍事遺址,前一站仔捌因為太陽能枋的工程,險險破壞著遺址。今春日鄉有心欲發展軍事觀光,也規劃各種自然資源、文化建築景觀,望吸引民眾來觀光,帶動在地產業。


行入深山林內,遮是春日鄉,佇屏東枋寮和歸崇村邊界的「石頭營」,內底的「戰鬥司令部」的要塞,真有歷史意義。鄉公所就來結合縣內自然景觀、文化建築,包含老七佳石枋厝部落、浸水營國家古道遮的所在做觀光。

早前,春日鄉就有咧發展軍事觀光。石頭營遮是全臺灣,甚至是全世界真罕見、保留上完整的二戰日本軍方的要塞地遺跡。1895年,日本就是對屏東枋寮遮登陸,後來為著持防美國,才會起遮爾有規模的軍事基地,可見這个所在確實有軍事價值。前一站仔因為太陽能枋的工程,差一點仔就破壞遺跡,而且閣挖出濟濟粒無piang7去的炸彈。佳哉關心歷史文化的民眾、學者、議員為石頭營走傱,目前遺跡暫時保留,也才有機會繼續發展觀光。

今春日鄉也斟酌規劃,望觀光帶動產業。行古道,看美景,也著來一逝石頭營,對照日本佇臺灣殖民的跤跡,思考開發、環境閣有文化資產中間的關係,也關心百年來發生佇咱土地的代誌。
 

相關新聞

專題|全台敬老金大調查