政治犯因違抗軍方食罪 今新生再叛亂案滿70冬

白色恐怖初期，韓戰拄戰煞，當時的臺灣政府為著向美國表達反對共產黨的成果，就學韓國的犯人營，佇政治犯的身軀頂，刺「反共抗俄」的字樣，結果這項運動失敗，有一寡政治犯予軍方算總數，予人加安一條叫「再叛亂」的罪名，計共14个人予軍方改判死刑，咱也來看這層得欲70年的綠島新生再叛puan3亂案。

1951年5月17，白色恐怖時期，頭一批因為思想無純正、參與叛亂組織等等名義掠來的政治犯，予人送去火燒島新生訓導處，日時上課、做思想改造，下晡去外口做工、勞動。

1950年前後國際情勢緊張，1945年第二次世界大戰結束，1947蘇聯和美國冷戰，1950韓戰開始，美國重新思考和中國的關係，美國先是派第七艦隊去台灣海峽，防止中共拍台灣，予台灣成做冷戰時期，東亞國家中反共陣線的一部份。1953年台灣政府學韓國犯人營，請政治犯佇身軀刺字，號做一人一事良心救國運動，就是欲向美國宣傳島內反共有成。

救國運動捒無成，軍方事後報鳥鼠仔冤，鎖定私底下串聯、有勸人莫刺字的政治犯，包括陳華、吳聲達、宋盛淼、張樹旺、蔡炳紅等等，計共14个人，去予人加安一條叫再叛亂的罪，經過嚴格複審，落尾攏改判死刑。

捌做過新生的蔡焜霖、楊國宇、盧鴻池，這馬攏八九十矣，in攏講行過烏暗閣通活落來，已經足幸運矣。明年綠島新生再叛亂案就滿70年，這陣國家人權博物館也佇白色恐怖綠島園區辦展覽，望予咱的囝孫仔，佇轉型正義的議題，有進一步的啟發和理解。