原本生佇南美洲的印加果，這款果子油脂帶真厚、營養閣豐富，也有人引進臺灣。雲林古坑有農民認為、印加果佇臺灣的市草應該袂䆀，決定欲來種看覓。

這款看起來若天星的印加果，原本是發佇南美洲。因為果子適合櫼油，有豐富的卵白質、胺基酸閣濟種維生素。雲林古坑的這位農民陳榮煌，伊想講印加果佇臺灣應該誠有發展，對六冬前開始種印加果，這馬愈種愈大片，也開發出濟濟相關產品。

陳榮煌原本佇嘉義經營三十外冬的幼兒教育，因為現代人囡仔生較少，決定退休轉故鄉種田，嘛會當順紲照顧厝裡序大。

印加果的營養價值，漸漸受著台灣民眾注意。這陣市面銷路嘛變較大。陳榮煌也揣在地農民，拍契約鬥陣種作，增加印加果的產量，帶動在地農業有新的發展。