蹛院的病人若需要臨時看護，費用攏誠懸。衛福部這馬佮病院、咧推捒智慧共聘的網路平台。會當予家屬、依照病人的需求、佇線頂揣看護，而且會使倩點鐘的。平台業者表示，目前平台有250外位照顧服務員，而且攏有執照。

厝裡若有人蹛院，欲倩看護，實在誠僫揣，衛服部這馬揣板橋亞東病院佮網路平台業者，共同咧捒照服員的線頂媒合服務。

這套app系統，上大的用途，就是予臨時欠照護員的民眾，會使連鞭揣著適合家己的照顧模式，閣用點鐘來算，毋免一擺就倩規工，簡單講，以一工24點鐘2400，民眾若只需要4點鐘的基本照護，只要900箍就好。網路業者也講，平台目前有兩百外位合格的照服員，in會用大數據，按民眾的需求做揀選配對。

針對照服員長期欠工的問題，亞東病院講，移工暫時無法度入來，病院病人轉對本土照服員的需求加欲二成，衛福部是表示，佇全台目前有三間病院咧合作試辦，也會閣看成效，勻勻仔擴大。