推廣臺語挑戰濟 林央敏一生注心挽救母語

佇1986年的時陣,有一位作家-林央敏,認為愛來保存台語文化,也用一首誠出名的歌曲「毋通嫌台灣」來表達台灣文化、語言受人壓迫的情形。經過歲月流轉,現此時的台語閣搪著啥物款的困境咧?咱做伙來聽看覓。

唱出當初家己參與社會運動寫的歌,這條"毋通嫌台灣"是林央敏老師佇1987年寫的歌詞。伊毋但關心國家社會,嘛足早就開始使用台語文來寫作,推捒台語文化運動。

除了台語的文學作品,林央敏閣捌寫過劇本、編過字典,寫過台文輸入法的電腦程式,伊講任何的思想攏愛透過語言這个媒介,只有台語,才會當完整表達台灣人的感情佮想法。

佇林央敏30外種無仝的文學作品當中,其中9000行、11萬字的胭脂淚,是台灣文學史目前為止,上長的詩,而另外一本菩提相思經,嘛是台語文學目前上大本的長篇小說。

推捒台語文學運動已經30外年,林央敏到今猶原不斷透過各種方式來推廣台語,甚至自己辦比賽鼓勵囡仔學習台語文。

林央敏嘛觀察著目前囡仔學台語的一寡問題。伊表示,現此時台語教的拼音傷過複雜,學習者華語佮台語邏輯定定相挵,顛倒影響台語推廣的效果。

林央敏表示,語言是文化的基礎,目前對政府到民間,雖然沓沓仔有愈來愈重視台語,猶是有真濟需要努力的空間。伊嘛希望未來國家會當儘量鼓勵各種台語文的創作者,予台語文化會當成做性命內底的一部份。

全台敬老金大調查

相關新聞