古蹟朴子配水塔久年拋荒 在地呼籲著重視

嘉義朴子市的配水塔，嘛予人叫做「朴子水塔」抑是「水道頭」，是日本時代為著欲改善食水的衛生才起的；6冬前成做縣定古蹟，毋過因為一直無好好仔管理，在地文史工作者，希望相關單位重視，莫予朴子重要的景觀地標一直拋荒。

草仔發甲滿滿是，水塔的四箍圍仔，嘛因為石頭仔可能會落落來，禁止民眾倚近，這座35公尺懸的朴子水塔佇2014年予指定做縣定古蹟，但是因為沒好好仔管理，這馬就按呢拋荒佇遐。

朴子佇1933年，因為欲改善當地用水衛生，所以才起這座朴子水塔。目前的管理單位是自來水公司，in嘛表示，水塔是古蹟，已經有送修整的計劃到文化部，只要計劃通過，就會趕緊來整修。

水塔的邊仔，閣有嘉義縣建設處移交予朴子市公所的裝置藝術品，考慮著安全的問題，目前暫時無開放。朴子市公所表示，會隨時來進行環境的整理，但因為經費不足，目前無法度做啥物改變，未來希望會用佮縣政府協調，重新思考整體空間的規劃。