嘉義傳烏面抐桮著傷流血 疑予風銃彈著

保育類的烏面抐桮，來臺灣過冬的數量愈來愈濟。毋閣最近，毋但佇嘉義布袋的湳地，有烏面抐桮的翼股著傷流血；佇高雄茄萣湳地，也發生一禮拜內，相連紲有十隻烏面抐桮破病、軟跤，或者是死亡。初步檢驗，可能是肉毒桿菌中毒。

這隻烏面抐桮佇湳仔地那行那掠魚仔討食，毋過伊倒爿翼股煞規片紅記記，應該已經受傷，民眾一看雄雄驚著，趕緊通報。

疼惜鳥仔的人士初九佇嘉義布袋國中頭前的湳仔地，發現這隻受傷的烏面抐桮，有人懷疑敢是予人用風銃彈受傷，佳哉隔轉工去看，這隻烏面抐桮猶原佮其他鳥仔做伙。

毋但驚烏面抐桮受傷，最近鳥友上煩惱的，其實是烏面抐桮佇高雄茄萣相連紲出現軟跤佮死亡，代先是志工發現一隻軟跤袂飛得，趕緊共救起來送病院，紲落來就發現屍體。

連紲一禮拜，佇茄萣攏總發現七隻死亡的烏面抐桮，以前毋捌出現這種情形，屍體已經交予動保處處理。

其實這個月佇茄萣湳仔地，已經出現三百隻烏面抐桮來過冬，數量比往年閣較濟，原底是好代誌，煞連紲有烏面抐桮中毒死亡，養工處已經採檢當地水質，因為佇高屏溪嘛有類似的事件，今年閣拄著雨水少，當地民眾嘛希望愛監控水質佮生態，予烏面抐桮有一个安全的所在通過冬。