今查著進口瘦肉精豬攏無罰 食安把關受質疑

立法院時代力量黨團,11/26早起舉行記者會,質疑目前的邊境管理,若準掠著有瘦肉精抑是其他違規的進口豬肉,衛福部上嚴重的處份,就干焦是退轉去、或者是毀掉,煞攏無其他的裁罰。毋過衛福部長陳時中是講,邊境查著的違規肉品,本來就是猶未完成入境,只會當按呢做。

有瘦肉精的美國豬肉咧欲開放進口,時力黨團提出過去的資料,批評衛福部佇邊境管理,過去若掠著進口商違法進口有瘦肉精的豬肉,攏干焦退貨、銷毀,煞無罰錢,就驚業者袂驚。

時代力量黨團提出衛福部提供的資料顯示,自2015至2017,捌調查著4間廠商予人驗出進口的美國豬肉有瘦肉精,攏干焦共退貨、銷毀,無用過食品安全衛生管理法來裁罰,另外嘛無公佈違法廠商的全名,恐驚會無法度減少違法。

針對時力黨團的質疑。陳時中認為,邊境查著的違規肉品,猶未完成進口程序,所以本底就無裁罰嘛無需要公布名單。另外,未來合格廠商入境會用逐批檢驗,若有違法進口超過萊劑限制量的豬肉,就會汰除名單。

全台敬老金大調查

相關新聞