百年舊臺南地方法院 見證臺灣司法民主史

國定古蹟臺南地方法院是1914年起的,已經超過百年的歷史,過去遮捌審理過「噍吧哖事件」。人權律師湯德章,因為228事件被槍殺了後,伊的律師執照,也是佇遮被撤銷的,做伙來看這棟保存濟濟司法記持的法院。

闊身闊身五角形的厝架外口,就著是圓拱形的厝頂,另外一爿瘦抽瘦抽尖塔形的設計,無對稱的建築理念,是國定古蹟舊台南地方法院上大的特色,伊也是台灣現在猶留落來的,唯一一棟佇日治時期起的大型法院。

圓拱形的大廳厝頂、佮雕刻精美的柱仔、猶閣有合綠建築概念的採光井,攏看會出巴洛克式的風格,是100冬前的歷史建築,也是100冬後的歷史見證。建築物的後壁面,有四個法庭,和一個足神祕的通道。

台南地方法院對1914年啟用,擔任87年的司法審判機關,佇啟用的隔轉年,就判一件撼動世界的審判。

30外冬後,1947年,日本人走矣,國民政府統治時期,湯德章律師被推薦做228事件處理委員會台南分會保安組組長,因為毋願將準備反抗者的名單交予政府,就按呢被依叛亂罪槍決,伊本人的律師執照,也是佇遮被撤銷登錄的。

台灣對威權行來到民主,超過一百冬,台南地方法院雖罔猶袂真正升格做司法博物館,不過這四冬來,透過濟濟文物的展覽,保存國民對司法的記憶,也積極推捒法治教育,予眾人見證台灣司法演變的點點滴滴。

相關新聞

專題|全台敬老金大調查