碧沙街掠歷史題材彩繪舊厝 加添人文藝術感

嘉義布袋碧沙街,一冬前道路楦闊,完工了後,街仔路雖罔新閣大條,毋過有的厝干焦剩一面壁,一寡所在變畸零地。這馬有藝術團隊來彩繪,往過舊厝離離落落,這馬漆甲新點點。

說到較早的代誌,社區的阿媽總有講袂煞的故事。這个社區過去的歷史,透過藝術團體的創作,這馬成做一个藝術空間。

嘉義縣布袋鎮的碧沙街,冬外進前道路楦闊(hùn-khuah),結果有的厝只賰一堵壁,藝術家團體為欲予這个所在有新的環境,特別利用畸零地規劃新的休閒空間。

藝術團體開一冬的時間來調查地方的歷史,以8个主題來呈現布袋漁村的漁業農產佮在地的人文歷史,閣配合路尾的故事館,予規逝(tsuā)路攏是在地个故事。

執行團隊表示,民眾來到布袋,大部分攏是去漁市場或者是懸屐仔教堂,其實社區內底嘛有誠在地的物件通好看, in準備佮社區佇後個月28舉辦活動,結合地方文化佮創意,向逐家紹介布袋的在地故事。

全台敬老金大調查

相關新聞