減輕收容壓力 送流浪狗去果子園鬥趕猴 - 公視新聞網

減輕收容壓力 送流浪狗去果子園鬥趕猴

流浪動物袂當安樂死的政策開始之後,各地的動物收容中心攏已經滇矣,為著解決這個問題,對這個月開始,高雄市動保處和民間合作,共流浪狗送去一寡果子園去農地做保全,替農民鬥趕猴,嘛減輕收容的壓力。

看著主人出現,狗仔攏蓋歡喜大聲咧吠,遮有28隻狗仔,攏是認養的。

其實遮每一隻狗仔原底攏是散狗,李建國佇屏東是做園藝設計,伊七、八冬前對中華民國動物保護協會分來28隻狗仔,這馬變做伊的農地保全。

雖然有遐濟狗仔,毋過in有自己的厝,逐工閣會使佇草地四界耍,另外協會志工定期會來拜訪,了解狗仔的健康,嘛會提供飼料、藥仔,民眾逐個月閣有五百箍的代養費通領。

協會這个計畫已經送出三百外隻的狗仔,因為有看著成果,今年高雄市動保處嘛欲佮in合作,目前已經佇桃源區揣著兩个所在。

高雄市目前兩个收容中心攏已經滿矣,估計五千五百隻流浪狗,一冬就會增加兩萬至三萬隻,壓力真大,毋閣農民敢適合飼狗仔,愛閣詳細做評估。

流浪狗經過訓練,會當鬥顧農地、厝內,民眾嘛愛考慮,家己敢有時間,畢竟一隻狗仔就是一條性命。

相關新聞

留言區