學生辦音樂會演奏竹樂器 感謝老師辛苦付出 - 公視新聞網

學生辦音樂會演奏竹樂器 感謝老師辛苦付出

南投竹山秀林國小的學生囡仔佇今年的教師節,專工替老師舉辦一場音樂會,感謝老師的照顧,囡仔有心、老師也真感動。

旋律輕快、節奏活潑,音樂聲聽入耳,壓力消敨袂少,人做一下輕鬆起來。南投縣竹山鎮秀林國小的學生囡仔演奏用竹仔做的種種樂器,來感謝老師佇平常時仔對in的照顧佮疼痛。

南投竹山竹仔上出名,毋過因為時代的演變、環境的變遷,製造產品的原料--竹仔漸漸予塑膠遮的材質代替,竹仔工藝也愈來愈衰弱,秀林國小為著傳承文化,配合地方的政策,推動課程教學生用竹仔做的樂器,共親手做的樂器提來演奏。今年的教師節,遮的學生就專工辦音樂會,用家己做的竹樂器來演奏歌曲,感謝老師的辛苦。

學生利用平常所學、以實際的行動表達心意,誠意感謝老師的付出,也大大加深和老師的感情。佇教師節彼工,學校的老師收著學生遮爾用心準備的禮物,有影攏誠感動。

留言區