捷傳學校為安光電枋 樹煞剉過頭引爭議 - 公視新聞網

捷傳學校為安光電枋 樹煞剉過頭引爭議

教育部鼓勵學校安太陽光電設備,高雄就有欲到30間的學校設光電球場,毋過施工的過程煞也有傷著樹仔的意外出現。就有校長表示,對學校來講,光電球場的好處比䆀處較濟,毋過欲做進前,學校也是愛佮居民溝通。

早起第三節課,鳳翔國中學生佇球場運動拍球,攏毋驚曝著日頭,因為籃球場頂頭有遮爾濟光電枋。

鳳翔國中,是全台第一座光電球場的學校,兩冬前,是校長家己接接業者,共學校四个籃球場,變做光電球場。學校免出錢,每冬閣會當收1%,差不多四萬外箍的回饋,毋閣光電枋畢竟毋是厝頂,會使閘雨。

看著鳳翔國中的案例,高雄、屏東愈來愈濟學校攏咧起光電球場抑是光電停車場,煞傳出傷著樹仔的例,親像小港的中山國中,球場邊仔30欉大樹樹尾予人剉掉、斷頭,其實進前樹仔攏遮爾懸,其他的學校嘛有共樹仔斷頭、徙走的情形,有的樹仔干焦賰樹身,實在蓋可惜。

進前佇屏東,嘛有學生家長不滿光電球場可能會犧牲囡仔活動的空間佮綠地,種電剉樹仔的爭議愈來愈濟。

護樹團體希望,政府推動光電設備,應該優先起佇厝頂,減少爭議,未來其他學校若欲起仝款的球場,恐驚嘛愛思考綠地生態的問題。無者,綠能校園煞來傷害綠樹,就失去原底保護環境的本意。

相關新聞

留言區