少年人行入農村、體驗庄跤生活、了解農村代，透過營隊，才知影農村的穡頭是誠無簡單。就是希望這寡少年家、未來也會當繼續關心農村，走揣一條未來的路。

農民一步一步教學生囡仔，欲掘番薯，愛按怎用鐮刀來除藤，手勢、方向、佮跤步攏總愛互相配合。

各地的大學生趁歇熱期間來到苗栗苑裡，和在地農民交流。在地的農友林清金作穡做一世人，伊想著庄頭內底干焦兩个少年轉來咧作田，心內誠感慨。

「夏耘農村訪調營隊」鼓勵少年人到台灣各地頭做田野調查，已經辦第十冬，今年由苗栗"苑裡掀海風"主辦，四工的課程安排甲滿滿滿，對農業政策到農村實際的狀況攏總有。有學員舊年參加過，今年閣轉來鬥跤手。

2018年一陣少年人做伙傱錢，佇苑裡開設「掀冊店」。一手掀冊、一手反塗，望成做在地公共事務討論的平台。在地囡仔轉故鄉，關心農村事，走揣一條未來的路。