李眉蓁干焦提24萬票 高雄的國民黨勢力漸衰微

國民黨李眉蓁，佇這擺補選干焦提著24萬外票，差不多兩成半的票。學者認為，這比2010年黃昭順的31萬票閣較少，也顯示國民黨佇高雄的勢力，確實有衰微。民眾黨這爿提無一成的票，有學者認為，柯文哲無佇地方拍好基礎，未來欲拓展政治版圖，恐驚會真困難。

國民黨籍候選人李眉蓁佇這擺高雄市長補選，提著24萬外票，占總投票率的兩成半，學者指出選前一暝，韓國瑜替李眉蓁徛台，其實有挽救著李眉蓁的選情。

雖罔學者認為韓國瑜對國民黨加減有加分的效果，不過若以2010年，國民黨佇高雄市推捒立委以來，提著上少的票數，31萬票來看，這擺補選結果，學者認為國民黨佇高雄的勢力，其實稍寡衰退。

不過民眾黨這爿，吳益政只提著無到一成的票，學者認為柯文哲欲佇地方布局，若只是吸收其他政黨的人，無培養家己的人才，未來欲拓展政治版圖，這條路恐驚會行甲真坎坷。

對這擺高雄市長補選的結果，學者認為國民黨就愛積極栽培地方少年的人才，對民眾黨也建議愛好好拍政黨的基礎，袂使只靠柯文哲一人弓規黨，未來才通得著閣較濟選民的信任和開闊的政治路。