臺南北門出名醫治烏腳病的王金河醫師、創作〈關仔嶺之戀〉的音樂家吳晉淮，這兩位的古早厝景緻到底啥款？公視台語台開台滿一週年，特別企劃《這間厝 彼个人》的臺語紀錄片，代先對臺南起行，採訪6個歷史名人在生所蹛的所在，經過鏡頭，予大家來回想生命過程的故事。
查某囝沓沓講出50年代的臺南，伊的爸爸王金河醫師，逐日攏為著致烏跤病的病人無閒tshih-tshih，hőng稱做烏跤病之父的王金河，是《這間厝 彼个人》其中一位主角，另外，閣有鹽分地帶文學代表作家吳新榮，和臺語音樂大師吳晉淮。
日本時代唯一的臺灣籍街長梁道，閣有早期臺南重要的生理人許藏春，以及南臺灣重要的畫家劉啟祥，攏總是「這間厝 彼个人」紀錄短片中的主角。
台語台的台長呂東熹強調，這一系列的紀錄短片，先按臺南起行，未來會繼續記錄和推廣。
