環境教育人員畫花草.註臺文 編教材傳承母語

母語會使講萬項代誌,佇臺北有一位母語媽媽,本身是環境教育人員,毋但對畫圖有興趣,也真愛臺語,因為發現市面真歹揣著紹介生態的臺語冊,伊就開始畫花畫草,標示臺語文,希望囡仔佇生活當中,學著臺語。

比媽媽畫的圖,阿芢當咧認捌這隻身軀黑黑,號做粉鳥鷹的一種lai5-hioh8。
陳俐璇提出一幅一幅的水彩作品,對闊葉樹、覓鴞翼到阿美族的穿插,圖的邊仔攏有台文字和羅馬拼音,陳俐璇講因為市面上,台語生態教材真呃揣,也因為伊有環境教育人員的背景,加上愛畫圖、愛台語,伊就按呢加己畫,也創一個面冊平台,和人分享。

全台語的生長環境,其實是陳俐璇的堅持,伊毋那對有孕的時開始接觸台語,也和厝內的人,共同打造全母語的生活環境,和囝仔做伙釘根。不過這項母語家庭的堅持,佇囝仔上幼稚園,大量接觸華語的時,也拄著一寡挑戰。

為著延續學校以外的台語使用環境,陳俐璇和濟濟台語家庭創活動,親像去野外行踏,打造生活中的台語情境,予囝仔有無仝的生活刺激,也維持講母語的自信。