少年農民栽種大姑金瓜 飼雞除蟲沃肥上天然

南投八卦山上,有一个少年農民咧種金瓜,種出親像西瓜遮爾大粒的金瓜,咱做伙來看。

遮是南投的八卦山,少年農民張侑真,開三冬的時間做實驗,共較大粒的金瓜籽留落來,經過人工弄花改良新品種。今年也因為有適合的氣候,總算是種出像西瓜遐大粒的金瓜。

共雞仔飼佇棚仔跤,雞仔毋但會當鬥除蟲,放落來的雞屎順紲當做肥料,實在是天然閣方便。另外,張侑真的小弟是對煮食真有興趣,用家己種的金瓜,發展出各種料理。

張侑真表示,若是民眾對在地的菜蔬有興趣,歡迎逐家注文導覽。若準拄著採收期,嘛會開放予遊客家己挽。