茶葉收成期欠工 南投茶農倩新住民鬥挽茶

茶園若欲採收，就會欠工、欠手腳。南投竹山的茶農，倩新住民的姊妹來鬥挽茶，咱作伙來看。

跤手扭掠，揀出優質的茶葉，是佇南投縣竹山鬥做散工，挽茶的新住民，為著解決茶園欠工的問題，原本茶農攏倩附近的年歲較大的阿姨阿姊，毋過因為人歹倩，而且阿婆阿姊的年歲也懸，這陣新住民姐姐也加入挽茶的穡頭。

那做穡那開講，挽茶的阿婆和新住民的姊姊做伙無閒，新住民的姊姊講，山頂的空氣好，挽茶的日子比蹛工廠閣較快活。

為著顧三頓，新住民的姊姊講出外打拼就愛骨力，佇遮綴逐家挽茶熟識真濟朋友，也了解臺灣的文化，毋過茶農也是希望政府佇茶葉大出的時，猶是愛加派寡人鬥挽，才有法度真正解決欠工的問題。