農友參觀林性欽果子園 請教種柑仔蜜撇步

彰化縣逐年攏會替種細粒臭柿仔提著冠軍的農民,舉辦觀摩會。今年就是秀水鄉的農友林性欽提著頭名,伊也盡量說明栽種的技術分眾人知,兼閣把握機會,爭取愈濟無仝款的線路,盡量推銷伊苦心栽培出來,口味上蓋讚的細粒臭柿仔。

大批的農友行入番茄園,向今年佇彰化縣第五屆小果番茄評鑑得著冠軍的林性欽請教,伊顧這片番茄園的撇步。

林性欽經過真濟擺的測試,才予番茄的甜度升到11度,而且攏無驗出有農藥殘留,逐粒食起來口感好,也予人食會著安心。彰化上有經濟價值的農作物原本是稻仔、花、葡萄和芭樂,不過這幾年因為有真濟青年人轉來故鄉,研究番茄的栽培技術,這陣佇彰化,包括秀水、二林、社頭到田中十偌个鄉鎮,計共三百偌公頃種做面積。

透過一年一擺的冠軍番茄果園觀摩會,與農友有真好的交流機會,互相研究番茄的栽培技術,也做伙開創各種的行銷平台,予逐家辛苦種的番茄會使打入閣較大的市場,增加收入。

相關新聞

專題|全台敬老金大調查