無仝品種的蝴蝶蘭，共敆做一欉，黃的、白的、紫色的，看過去，予人看著誠清心，遮的蘭花原本攏欲削去國外，不過受武漢肺炎疫情影響，蘭花的是市草變䆀，這陣為著消敨蘭花，屏東縣萬巒鄉的蘭花業者決定贊助5000株蘭花，予萬巒鄉立圖書館。
不管你行到佗一區，只要看冊看甲忝矣，頭櫸起來，就有蝴蝶蘭會使欣賞，萬巒圖書館也將業者的這份好意，共推動閱讀的風氣，做伙推，望民眾加來圖書館行踏，來借冊，就通共珍貴的蝴蝶蘭栽，紮轉去厝種。
毋那萬巒圖書館鼻有蝴蝶蘭的香氣，這陣萬巒鄉濟濟里，也分著業者送的蘭花栽，等到明年春天到位，屏東縣大街小巷就有花開的景致，業者也希望等到彼當陣，蘭花經濟會使開出媠氣的成績。
