5百年老樹牽連地方變遷 德國人類學者來臺走揣

進前有一个德國的「文化人類學」的學者,為著欲揣咱臺灣一欉5百年久的楓樹,專工對千里外,來到雲林縣斗六市楓樹湖社區,毋過到地才發見,這欉老樹已經無佇咧矣。在地的繪本作家黃惠玲,知影這層代誌,毋甘5百年的楓樹去予居民放袂記,就專工共老樹的故事畫做尪仔冊,嘛希望讀者來針對咱人面對自然的態度,想一下較真咧。

老樹定定是1个地所的標仔,記錄社區的變遷佮居民的記憶。壁頂1張1張舊相片,是雲林縣斗六市楓樹湖社區居民生活的記持,老一輩的人攏會記得地方有1欉5百年的楓樹,毋過這欉樹仔落尾是留無牢,逐家對老樹的印象嘛漸漸無去。

為著欲保存5百年楓樹的故事,繪本作家黃惠玲專工共佮老樹相關的往事,畫做尪仔冊「五百年後」,毋過黃惠玲會創作這本尪仔冊,閣有1个上蓋關鍵的起因。

按德國來的文化人類學者安德烈,為著欲揣地圖頂面標示的5百年楓樹,專工來到臺灣,走揣樹仔的時,了解著楓樹湖社區老樹的故事,毋過這馬已經看無這欉老樹,黃惠玲知影這件代誌,閣毋甘5百年的楓樹予居民放袂記,才會專工畫做尪仔冊。安德烈佮黃惠玲攏向望這本尪仔冊,通予民眾了解地方的風華,嘛重新思考咱人佮自然的關係。