全國第一間 久美國小結合布農.鄒族實驗學校

南投信義鄉久美國小,進前有實施民族實驗教育,而且閣是全國頭一間共布農族、鄒族兩个文化語言,施行佇教育的學校;毋但予學生學習文化,也揣著族群的認同。

老師認真咧教學生,予in通佇雙族語的學習環境,認捌家己族群的文化。南投信義鄉的久美村,是鄉內唯一 一个有布農族佮鄒族蹛做伙的部落,所以久美國小佇轉型了後,也共這兩族的文化囥入去課程內底。

久美國小會當講是全國頭一間,布農族結合鄒族的民族實驗學校。校方共這兩族的語言文化,透過無仝款的方式排入去課程,予學生學習。而且這寡課程也予原本感覺較弱勢的鄒族學生,重新熟似家己的族群。

久美村是南投縣目前唯一猶有蹛鄒族人的部落,原底已經強欲予布農族同化,毋過,久美國小的師生透過族群文化教育課程,毋但予學生的學習更加多元豐富,也增加對族群的認同和驕傲。