南投布農族人轉去祖居地 路途坎坷望起新橋

南投縣信義鄉內底,有一搭七彩湖是布農族的聖地。十外冬前,迵過七彩湖的「孫海橋」,去予大水拍斷去;信義鄉公所共中央政府爭取經費,欲起造新橋、開便道,希望予眾人出入閣較利便。

車先蹽水過溪,煞落去閣愛行這全全是石頭仔的山路,彎彎斡斡,而且路況真bái,一下無細膩可能就跋落萬丈深坑。毋過,這煞是南投的布農族人,欲轉去祖居地七彩湖一定愛行的路。

十外冬前,因為部落往丹大林區,提供出入的孫海橋予大水沖斷去,當地的族人若欲轉去七彩湖,就愛冒著風險趁焦水期蹽溪過。鄉公所考慮著民眾的安危,這陣也拍拚爭取經費,希望新橋緊造好。

另外,因為七彩湖景致媠,所以也唌濟濟的山友專工去遐peh山。當地居民認為,重建新橋也著顧全周邊的環境,也煩惱講交通若變利便,聖地會被破壞。

七彩湖因為佇深山林內,較少人行跤到,tsua̋n保留原始高山湖的特殊環境。信義鄉公所除了拍拚揣重建橋的經費和方案,也呼籲眾人同齊守護七彩湖這款難得的美景。