南投布農族人轉祖居地 路途坎坷望起新橋 - 公視新聞網

南投布農族人轉祖居地 路途坎坷望起新橋


南投縣信義鄉內底,一搭七彩湖,是予布農的原住民,看作真神聖的地所。十外冬前,七彩湖頂,迵對丹大林區去的孫海橋,去予大水拍斷去,布農的族人,閣來煞攏著愛蹽水過溪。信義鄉公所今就真積極,咧共中央政府爭取經費起新橋、開便道,望欲予眾人出入閣較利便。

車先蹽水過溪,煞落去閣愛行這全全是石頭仔的山路,彎彎斡斡,而且路況真bái,一下無細膩可能就跋落萬丈深坑。毋過,這煞是南投的布農族人,欲轉去祖居地七彩湖一定愛行的路。

十外冬前,因為部落往丹大林區,提供出入的孫海橋予大水沖斷去,當地的族人若欲轉去七彩湖,就愛冒著風險趁焦水期蹽溪過。鄉公所考慮著民眾的安危,這陣也拍拚爭取經費,希望新橋緊造好。

另外,因為七彩湖景致媠,所以也唌濟濟的山友專工去遐peh山。當地居民認為,重建新橋也著顧全周邊的環境,也煩惱講交通若變利便,聖地會被破壞。

七彩湖因為佇深山林內,較少人行跤到,tsua̋n保留原始高山湖的特殊環境。信義鄉公所除了拍拚揣重建橋的經費和方案,也呼籲眾人同齊守護七彩湖這款難得的美景。

留言區