罕見牛奶果真清甜 口感像水浸粿好落喉


食起來像粉鳥舅,清甜閣有牛奶香的牛奶果,是越南、泰國捷看著的水果,佇臺灣無普遍。不過,南投國姓鄉的果子農葉光華,20外年前就開始種,佇伊的果子園有200外欉,也是國姓鄉產量上大種牛奶果的果子農。



共套袋仔拆落來,這粒形體圓圓、茄仔色皮的果子,號做金星果,看起來和時計果的形體欲仝仔欲仝。共切開了後,牛奶色的汁流出來,閣鼻會著牛奶的香氣,所以也有人叫伊牛奶果。三月到五月當是牛奶果大出,南投縣國姓鄉的果子農講,因為大部分牛奶果,攏是對越南和泰國引入來種的,所以其實真濟台灣人,攏毋曾食過這項清甜和軟khiu7的果子。



講起種牛奶果,葉光華講家己原底外行外路,因為過去伊是佇石門村種葡萄,20偌冬前,收著親戚送的牛奶果樹栽,成作種出興趣,閣發出較矮的樹叢,較好修剪。這陣伊種的牛奶果,有1公頃,超過200欉,伊也變做國姓鄉種上濟牛奶果的人。


國姓鄉公所農經課長郭俊龍表示,佇台灣種牛奶果的人無濟,不過台灣燒熱天氣,真適合種,估計特級品一斤會當賣百五,也因為牛奶果有真濟蛋白質、和鐵質,營養分懸,所以這幾年也予人注目,未來會愈來愈有市場。

記者 綜合報導
 

全台敬老金大調查