東北季風到坱埃就飛 濁水溪邊居民受影響


若到東北季風的季節,濁水溪附近就是塗粉仔、坱埃滾絞,為著欲改善這個問題,5冬前,種樹仔團體;佇雲林的台西、崙背、麥寮、西螺這四个鄉鎮,進行種樹仔計畫,毋但空氣變好,生態也變佮真豐富。

逐年佇東北季風的期間,濁水溪四周圍風飛坱埃的情形嚴重,毋那影響附近居民的生活品質,河岸環境也受著嚴重的破壞。為著改善這个問題,有種樹團體惦西螺高灘地,用這種號做水源寶植樹盆的物件,種有法度適應土肉乾燥的栽仔,增加植物活絡去的機率。

用這水寶盆,予栽仔的下底面會使較濕,保留水分,增加活命的機會達到95%。種樹仔的專家表示,無仝的土肉,適合種的植物品種也無仝,IN惦5年前開始,分別佇雲林縣台西、崙背、麥寮和西螺,四个鄉鎮,種樹仔固定沙土,阻止風飛沙。

佇海岸邊種栽仔,淨化空氣,也打造多元的森林型態,予小動物會使惦遮休睏、生湠,這陣濁水溪附近的海岸景象無閣再是光禿禿的畫面,成做是新的生態景點。