烏面抐桮肉毒桿菌中毒 今治療好勢.轉去大自然

正月尾,佇臺南市學甲溼地生態園區遮,有發生一寡烏面抐桮,因為食著肉毒桿菌來中毒的事件。這中間有一隻染著病的烏面抐桮,就是交代「特有生物研究保育中心」,治療到今個外月,總也已經原全。今眾人就共這隻烏面抐桮放轉去大自然,望伊自由生活。

眾人來到學甲溼地,共籠仔開開,1隻烏面抐桮沓沓行出來,共翅股展予開,飛起去空中,轉去大自然生活。疼惜鳥仔的人士歡喜甲拍噗仔。

今年正月尾,這隻烏面抐桮倒佇學甲溼地,強欲無氣絲,予生態保育學會的志工發現,隨通報「特有生物研究保育中心」,共伊送去動物病院救治,經過醫生診斷,認定是因為肉毒桿菌來中毒。

今經過病院專業的治療,佮志工周至的照顧,這隻烏面抐桮身體已經原全,順利倒轉去大自然。臺南市長黃偉哲感謝人員的拍拚。

另外,農業局表示,因為氣候咧變化,烏面抐桮誠敖穢著肉毒桿菌來破病,甚至死亡。民眾若發現有烏面抐桮無法度飛,抑是覆佇塗跤peh袂起來,著趕緊通報相關單位,做伙保育烏面抐桮。

綜合報導