緊急救援系統 老大人頭燒耳熱會當隨通報

這馬愈來愈濟老大人1个人蹛,定定有老大人佇厝艱苦攏無人知。屏東縣政府推出一套「緊急救援系統」,有專門的人共老大人問好,嘛佇老大人有需要的時,會當趕緊叫來人幫忙。

現代社會誠濟序小攏出外做工課,無佮序大人蹛做伙,所以有越來越濟老大人一个人蹛,若是老大人佇厝lin跋倒抑是艱苦攏無人知。屏東縣政府就推出一套「緊急救援系統」,委託屏東基督教醫院定時共老大人問好,嘛佇阿公阿媽有需要的時,趕緊來鬥相共。

阿公阿嬤頷頸仔掛的這條袚鍊,可以緊急求助,隨時掛在身軀上,若有狀況,隨按落去就會當通知人趕緊來鬥相共。

這套緊急救援系統,主要有一台主機囥佇厝lin,平常時仔老大人就會按報平安,安呢受理中心就會知影,老大人無啥物特殊狀況,若是老大人袂記來按,受理中心就會敲電話去厝lin,確認老大人的安全。

根據屏東縣府統計,到2019年6月份為止,縣內家己蹛的老大人差不多有2,800 人,占屏東總老年人口數2.1%,算起來大約 100 人就有 2 位老大人一个人蹛,但是目前有安緊急救援系統的老大人干焦有166人,歡迎有需要的老大人攏來申請,向望提供這寡家己蹛的老大人有閣較安全環境。

記者 綜合報導