武漢肺炎湠到全世界 確診病例直直增加


來關心武漢肺炎,全世界目前診斷確定的病例,已經超過6萬4千人,來看下晡上蓋新的統計資料 :

這陣中國,有63855个病例,1380个人致病死亡。中國衛生健康委員會表示講,因為進前湖北省,死亡病例算了有重複,今仔日改正統計的數字,減掉108个人。臺灣是無新增加確定的病例。日本昨昏做一下增加4層病例,尤其是攏無出國旅遊的經過,另外閣有一个患者死亡,目前日本國內,計共34例。香港是53例,越南16例,新加坡58例,馬來西亞有19个患者。

西洋國家這爿面,美國新增一名,頂禮拜五,坐撤僑班機轉去的患者,這也是德州頭一層案例,目前美國,確診病例計共是15个。


因為中國共無經過檢驗,干焦醫生看症頭斷定,遐的患者,嘛攏總列做確診的病例,目前致病的人數,做一下貫破6萬人,抑世界衛生組織是表示理解,講in知影這毋是病症咧湠,有啥物大變化。英國,進前按武漢接轉去的83个國民,隔開觀察的時間到,攏無人驗著病毒,若美國,是有欲針對國內5个都市,可能有穢著流行性感冒的病人,檢驗看敢有武漢肺炎的病毒。